Psa 91 | KYG | STEP | Hogote Ala ne'apimo fala kino mai'niyategamo haino ne'maiya vekamo'a lokiya'age vekamo aunefi'mo fala kino maige maige huno maigiye.

Psalms 91

Ala ne'apimo fala kino mai'niyategamo haino ne'maiya vekae'mo ava gemae

1 Hogote Ala ne'apimo fala kino mai'niyategamo haino ne'maiya vekamo'a lokiya'age vekamo aunefi'mo fala kino maige maige huno maigiye. 2 Nagaemo Ala kava nefe'mo hu'nae'mo, agaepi'mo fala ki'na mai'nogeno faino ku aino yagaino nate'neno naha maeno nagufamo alino katino nate'niya veka'nimo mai'niye. Goti'nimo'mo mai'niyanageno, naha maegaiye, hu'na huguve.

3 Agaemo o'age'nana nofiteti'mo ane'aimo hanagi'a ae'a katafaugefe'mo hisaya nofi'mo'a okatafausiyafe'mo hatu maeno kateteno lusi kaita'mo kahausigekae'mo ofalisanafe'mo alagepa huno yagaino kategaiye. 4 Agaemo hakumo alino atalelineno hakufi'mo alino fala kino katesigeka alagepa huka hakufi'mo fala kika maigane. Lama ge'amo'mo kagae halegukana huno hane'neno yagaino katesigeka maigane. 5 Apakaemo hanipife'mo koli hisaya yafe'mo kagaemo koli osugane. Kevemo'mo malage huno eno hani'niya kava huno yegemo neleya afina'mo hosu kava'mo'a malage huno kahaesiya kavafe'mo koli osugane. 6 Hani'ilagamo lusi kaita'mo kahausigekae'mo koli osugane. Felugamo alopa hanageke ya'mo kagaete'mo afole aisiya kavafe'mo koli osugane.

7 Kahaopale'mo vani tauseni'a vaya'mo falige lamaga kahaopale'mo teni tauseni'a vaya'mo falige hu'a falisageno'ae'mo falisana kava'mo kahaopale'mo afole o'aigiye. 8 Kahaopale'mo afole o'aigiya'monanafa kaulagafatike'mo hosu vaya'mo hosu kava'mo anona'apilefe'mo hosu ya'mo alisageka apakegane.

9 Kagaemo u'na fala ki'nova vekafife'mo, agaepi'mo maige maige hu'na maiguve, huka hu'nana'mofe'mo mago hosu ya'mo'a okahaesigeno hosu kaita'mo nokale'mo afole o'aigiye. 11 Ala kava ne'mo'a enisole vaya'ae'mo, yagaitapa ateyo, huno hapa paisige'a muki afina'mo kategamo umenitata hisana afina'mo yagai'a kategaya'mofe'mo hosu kava'mo kagaete'mo alagi afole o'aigiye. 12 Apayateti'mo kavale'a kasagausageno yafa'mo'a kaiyafi'mo okahaegaiye. 13 Kaiyaleti'mo laiyoni'e nagalo'yave'e'mo aeka latapaigane.

14 Goti'a, nagaefe'mo hau ayamopafi'mo hau'niya'mofe'mo agufamo ali'na kati'na ategauve, huno hu'niye. Nagi'nimo afino alagepa hu'niya'mofe'mo ali'na asaga hu'na ategauve. 15 Nagaefe'mo keya aeno ge hisige'nae'mo afiguve. Hanageke ya'mo ne'alisige'nae'mo agae'e'mo magokepi lokae'na maiguve. Agufamo ali'na kati'na atete'na ala agi'amo amiguve. 16 Yatala kafugamo maisiya ya'mo amisugeno'ae'mo, haine, huno huteno hao ke hegaiye. Agufamo ali'na kati'na ate'nova kava'nimo aepa'amo ali'na ave liguve, huno hu'niye.